ஜெனீவா மனித உரிமைச் சபையில் பிரித்தானியா உள்ளிட்ட மேற்குலக நாடுகளினால் முன்வைக்கப்படவுள்ள இலங்கை தொடர்பான பிரேரணைக்கு ரணில் விக்கிரமசிங்க தலைமையிலான ஐக்கிய தேசியக் கட்சி அரசாங்கம் இணை அனுசரணை வழங்கி மேலும் இரண்டு வருட கால அவகாசத்தையும் கோரவுள்ளது.
ஆனால், ஜெனீவா பிரேரணைக்கு இணை அனுசரணை வழங்க வேண்டிய அவசியம் இல்லையென்றும் இரண்டு வருடகால அவகாசம் தேவையில்லை எனவும் ஜனாதிபதி மைத்திரிபால சிறிசேன கூறி வருகின்றார்.
ஜனாதிபதியின் இந்த நிலைப்பாட்டையே ஜெனீவா செல்லவுள்ள அமைச்சர்கள் இருவரும் ஆளுநர் சுரேன் ராகவனும் விளக்கமளிக்கவுள்ளனர். அதற்கான ஏற்பாடுகள் ஜனாதிபதி செயலகத்தினால் மேற்கொள்ளப்பட்டு வருகின்றன.
இந்த நிலையில் இருவேறு கருத்துக்களுடன் ஜெனீவா செல்வதா என்பது குறித்து மைத்திரிபால சிறிசேன, ரணில் விக்கிரமசிங்க ஆகியோரிடையே வாதப்பிரதி வாதங்கள் ஏற்பட்டுள்ளதாக உள்ளகத் தகவல்கள் கூறுகின்றன.
ரணில் விக்கிரமசிங்கவின் சார்பில் ஐக்கிய தேசியக் கட்சியைச் சேர்ந்த அமைச்சர்கள் அல்லது உயர் அதிகாரிகள் விரைவில் ஜெனீவா சென்று மேலும் இரண்டு வருடகால அவகாசத்தைக் கோரவுள்ளனர்.
போர்க்குற்ற விசாரணை, பொறுக்கூறல் உள்ளிட்ட பல விடயங்களை நடைமுறைப்படுத்தும் நோக்கில் மேலும் இரண்டு வருடகால அவகாசம் ஜெனீவா மனித உரிமைச் சபையினால் வழங்கப்படவுள்ளது.
தமிழ்தேசியக் கூட்டமைப்பு ரணில் விக்கிரமசிங்கவின் நிலைப்பாட்டுடன் ஜெனீவா செல்லவுள்ளதாக தமிழரசுக் கட்சித் தகவல்கள் கூறுகின்றன.
இலங்கை அரசாங்கத்துக்கு மேலும் இரண்டு வருடகால அவகாசம் வழங்கப்படவுள்ளதை கூட்டமைப்பின் பேச்சாளர் சட்டத்தரணி சுமந்திரன் வரவேற்றுள்ளமை குறிப்பிடத்தக்கது.