தெஹிவளைப் பிரதேசத்தில் கைதான ஒருவர் இராணுவத்தின் தடுப்புக் காவலில் இருக்கின்றாரா? இல்லையா? ஏன்றுதான் கேட்டதாகவும் அவரை விடுதலை செய்யுமாறு இராணுவத் தளபதியிடம் கோரவில்லையெனவும் ரிஷாட் பதியுதீன் விளக்கமளித்துள்ளார்.
இலங்கையில் உயிர்த்த ஞாயிறன்று தாக்குதல் நடத்திய ஐ.எஸ்.ஐ.எஸ் இஸ்லாமியவாதிகளுடன் தொடர்புடைய சந்தேகநபர் ஒருவர் தெஹிவளைப் பிரதேசத்தில் கைது செய்யப்பட்டிருந்தார்.
அந்தச் சந்தேகநபரை விடுதலை செய்யுமாறு ரிஷாட் பதியுதீன் மூன்று தடவைகள் தன்னிடம் கேட்டிருந்தாக மகேஸ் ரட்னாயக்கா நேற்று வியாழக்கிழமை கொழும்பில் செய்தியாளர்களிடம் கூறியிருந்தார்.
ஆனால் அழுத்தங்கள் கொடுக்கவில்லையெனவும் அப்படி விடுதலை செய்யுமாறு கேட்பது அவருடைய உரிமை என்றும் மகேஸ் ரட்னாயக்கா தெரிவித்திருந்தார்.
இதற்குப் பதிலளித்த ரிஷாட் பதியுதீன், அமைச்சர் என்ற முறையில் நீர்கொழும்பில் உள்ள முஸ்லிம் மக்கள் பலர் தொலைபேசியில் தொடர்பு கொண்டு பாதுகாப்புத் தொடர்பாகப் பேசியதாகவும், இதனால் நீர்கொழும்பில் பாதுகாப்பு வழங்க ஏற்பாடு செய்யுமாறு இராணுவத் தளபதியிடம் கேட்டிருந்ததாகவும் கூறினார்.
நீர்கொழும்பில் உயிர்த்த ஞாயிறன்று தற்கொலைத் தாக்குதலில் கொல்லப்பட்டவர்களின் சடலங்கள் நல்லடக்கம் செய்யப்படும் போது வன்முறைகள் ஏற்படலாமென முஸ்லிம் மக்கள் தன்னிடம் கூறியதாலேயே இராணுவத் தளபதியுடன் தொடர்பு கொண்டு பாதுகாப்புத் தொடர்பாகப் பேசியதாகவும் ரிஷட் பதியுதீன் விளக்கமளித்திருந்தார்.
கைதான சந்தேக நபர்கள் எங்கே தடுத்து வைக்கப்பட்டுள்ளனர் என்பது குறித்து ஏனைய முஸ்லிம் அமைச்சர்களிடமும் பாதிக்கப்பட்ட முஸ்லிம் மக்கள் கேட்டதாகவும் ரிஷாட் பதியுதீன் கூறியுள்ளார்.