செய்தி: நிரல்
நவ. 22 14:37

பிரித்தானிய ஊடகத்துக்கு எதிராகப் பிக்குமார் கொழும்பில் தூதுரகம் முன் ஆர்ப்பாட்டம்

(வவுனியா, ஈழம்) புதிய ஜனாதிபதியாக தெரிவு செய்யப்பட்டுள்ள கோட்டாபய ராஜபக்சவை தமிழ் இன அழிப்பாளர் என விமர்சித்துச் செய்தி வெளியிட்ட சர்வதேச செய்தி நிறுவனம் மீது சட்ட நடவடிக்கை எடுக்குமாறு கோரி கொழும்பில் ஆர்ப்பாட்டம் ஒன்று இடம்பெற்றுள்ளது இந்த ஆர்ப்பாட்டத்தில் பௌத்த பிக்குமார் உள்ளிட்ட பலர் கலந்துகொண்டனர். நேற்று வியாழக்கிழமை கொழும்பு-07 பௌத்தாலோக மாவத்தையில் உள்ள பிரித்தானிய உயர் ஸ்தானிகராலயத்திற்கு முன்பாக ஆர்ப்பாட்டம் நடைபெற்றது. பிரித்தானிய தூதரகத்தில் மகஜர் ஒன்றும் கையளிக்கப்பட்டுள்ளது. இதன்போது, பிரித்தானியால் உள்ள சர்வதேச செய்தி நிறுவனம் ஒன்று இலங்கை ஜனாதிபதியாக கோட்டாபய ராஜபக்ச தேர்ந்தெடுக்கப்பட்ட போது அவரைத் தமிழ் இன ஒழிப்புக்கு காரணமான இராணுவத் தலைவரெனக் கூறியதாக ஆர்ப்பாட்டக்கார்கள் தெரிவித்தனர்
நவ. 21 22:00

ஐந்து மாணவர்கள் கொலை வழக்கின் குற்றப் புலனாய்வுப் பணிப்பாளர் திடீர் இடமாற்றம்

(மட்டக்களப்பு, ஈழம்) கொழும்பில் ஐந்து மாணவர்கள், உட்பட பதினொரு தமிழர்கள் கடத்திக் கொலை செய்யப்பட்ட வழக்கு விசாரணை, ஊடகவியலாளர் லசந்த விக்கிரமதுங்க, றக்பி வீரர் தாஜுதீன் ஆகியேரின் கொலை வழக்கு விசாரணைகள் தொடர்பாகக் கடமையாற்றி வந்த இலங்கைக் குற்றப் புலனாய்வுப் பிரிவின் பணிப்பாளர் ஷானி அபயசேகர திடீரென இடமாற்றம் செய்யப்பட்டுள்ளார். இந்த உத்தரவை ஜனாதிபதி கோட்டாபய ராஜபக்ச பிறப்பித்துள்ளார். இலங்கையில் இடம்பெற்ற மிக முக்கியமான கொலைக் குற்றங்கள் தொடர்பான விவகாரங்களை வெளிப்படுத்திய குற்றப் புலனாய்வாளரான ஷரனி அபயசேகர தெற்குப் பிரதிப் பொலிஸ் மா அதிபரின் தனிப்பட்ட உதவியாளராக நியமிக்கப்பட்டுள்ளார்.
நவ. 21 14:22

பிரதமராக மகிந்த ராஜபக்ச பதவியேற்பு- அமைச்சரவை நாளை நியமனம்

(வவுனியா, ஈழம்) இலங்கை ஒற்றையாட்சி அரசின் புதிய ஜனாதிபதி கோட்டாபய ராஜபக்ச தனது சகோதரர் முன்னாள் ஜனாதிபதி மகிந்த ராஜபக்சவுக்கு பிரதமர் பதவியை வழங்கியுள்ளார். கொழும்பு காலிமுகத்திடலில் அமைந்துள்ள ஜனாதிபதி செயலகத்தில் இன்று நண்பகல் ஒரு மணிக்கு பதவிப் பிரமாணம் இடம்பெற்றது. நிகழ்வில் முன்னாள் ஜனாதிபதி மைத்திரிபால சிறிசேன, பிரதமர் பதவியில் இருந்து விலகிய ரணில் விக்கிரமசிங்க ஆகியோர் உள்ளிட்ட முக்கிய பிரமுகர்கள் பங்குபற்றியிருந்தனர். கோட்டாபாய ராஜபக்ச அதிகாரபூர்வமாக பிரதமர் நியமனத்தை மகிந்த ராஜபக்சவுக்கு வழங்கினார். அதனையடுத்து இன்று பிற்பகல் கொழும்பில் உள்ள பிரதமர் அலுவலகத்தில் தமது கடமைகளை மகிந்த ராஜபக்ச ஆரம்பித்தார்.
நவ. 20 22:14

இடைக்கால அரசாங்கம்- மகிந்த பிரதமராகிறார்- பதினைந்து பேர் கொண்ட அமைச்சரவையும் நியமனம்

(வவுனியா, ஈழம்) இலங்கை ஒற்றையாட்சி அரசின் ஜனாதிபதியாக கோட்டாபய ராஜபக்ச சென்ற திங்கட்கிழமை பதவியேற்றுள்ள நிலையில் தற்காலிகமாக இடைக்கால அரசாங்கம் ஒன்றை அமைக்கவுள்ளார். ரணில் விக்கிரமசிங்க இன்று புதன்கிழமை மாலை பிரதமர் பதவியில் இருந்து விலகவுள்ளதாக அறிவித்துள்ளார். அதிகாரபூர்வமாக நாளை வியாழக்கிழமை ஜனாதிபதி கோட்டாபய ராஜபக்சவுக்குப் பதவி விலகல் கடிதம் அனுப்பவுள்ளதாகவும் இன்றிரவு அலரிமாளிகையில் வைத்துக் கூறினார். இந்த நிலையில் அடுத்த ஆண்டு மார்ச் மாதம் நாடாளுமன்றம் கலைக்கப்படும் வரை இடைக்கால அரசாங்கம் ஒன்றை ஜனாதிபதி கோட்டாபய ராஜபக்ச அமைக்கவுள்ளார். பிரதமராக தற்போது எதிர்க்கட்சித் தலைவராகவுள்ள முன்னாள் ஜனாதிபதி மகிந்த ராஜபக்ச நியமிக்கப்படவுள்ளார்.
நவ. 19 20:24

ஜனாதிபதி கோட்டாபய ராஜபக்ச டில்லி செல்கிறார்- இந்திய வெளியுறவு அமைச்சர் கொழும்பில் சந்தித்தார்

(வவுனியா, ஈழம்) இலங்கை ஒற்றையாட்சி அரசின் ஜனாதிபதியாக கோட்டாபய ராஜபக்ச பதவியேற்று இரண்டாம் நாளான இன்று செவ்வாய்க்கிழமை மாலை இந்திய வெளியுறவு அமைச்சர் ஜெய்சங்கர் கொழும்புக்கு வருகை தந்துள்ளார். கோட்டாபய ராஜபக்ச ஜனாதிபதியாகப் பதவியேற்றதும் இலங்கைக்கு வருகை தந்த முதலாவது வெளிநாட்டுப் பிரதிநிதி இந்திய வெளியுறவு அமைச்சர் ஜெய்சங்கர் என்று ஜனாதிபதி செயலகம் தெரிவித்துள்ளது. இந்தியாவுக்கு வருமாறு பிரதமர் நரேந்திரமோடியின் அழைப்பை வெளியுறவு அமைச்சர் ஜெய்சங்கர் கோட்டாபய ராஜபக்சவிடம் கையளித்தார். ஜனாதிபதி செயலகத்தில் சந்தித்த இந்திய வெளியுறவு அமைச்சர் ஜெய்சங்கர், எதிர்கால இராஜதந்திரச் செயற்பாடுகள் குறித்துப் பேசியுள்ளதாக ஜனாதிபதி செயலகத் தகவல்கள் கூறுகின்றன.