(வவுனியா, ஈழம்) இலங்கையின் வடமத்திய மாகாணம் அனுராதபுரம் மாவட்டத்தில் உள்ள சிறைச்சாலையில் இலங்கைப் பொலிஸார் நடத்திய துப்பாக்கிச் சூட்டில் மூன்று கைதிகள் உயிரிழந்துள்ளனர். தமிழ் அரசியல் கைதிகளும் தடுத்து வைக்கப்பட்டுள்ள இந்த சிறைச்சாலையில் இன்று சனிக்கிழமை மாலை இந்தச் சம்பவம் இடம்பெற்றுள்ளது. குறித்த சிறைச்சாலையில் கொரோனா அச்சம் காரணமாக கைதிகள் சிறை உடைப்பு முயற்சியில் ஈடுபட்டதாகவும் இதனால் கைதிகளை நோக்கித் துப்பாக்கி சூடு நடத்தப்பட்டதாலேயே மூன்று கைதிகள் உயிரிழந்ததாக சிறைச்சாலைத் தகவல்கள் கூறுகின்றன. ஆனாலும் இலங்கைச் சிறைச்சாலை அதிகாரிகள் கைதிகள் உயிரிழந்ததை உறுதிப்படுத்தவில்லை.

(முல்லைத்தீவு, ஈழம் ) இல்ங்கை அரசாங்கம் தொடர்ச்சியாக வடக்குக் கிழக்குத் தாயகப் பிரதேசங்களில் கொரோனா வைரஸ் தொற்றியுள்ளதாகச் சந்தேகிக்கப்படும் மக்களைத் தனிமைப்படுத்தும் நிலையங்களை அமைத்து வருகின்றது. ஏலவே மட்டக்களப்பு, வவுனியா, மன்னார் பிரதேசங்களில் தடுப்பு முகாம்கள் அமைக்கப்பட்டுள்ள நிலையில் தற்போது முல்லைத்தீவு கேப்பாப்பிலவு பிரதேசத்தில் கொரோனா வரைஸ் தனிமை்ப்படுத்தும் நிலையம் அமைக்கப்பட்டுள்ளது. குறித்த பிரதேசத்தில் உள்ள இலங்கை விமானப்படையினரின் முகாமிலேயே கொரோனா தடு்ப்புத் தனிமைப்படுத்தும் நிலையம் அமைக்கப்பட்டுள்ளது. இந்தியாவில் இருந்து வருகை தந்த 41 பேர் அங்கு தனிமைப்படுத்தப்பட்டுள்ளனர்.

(மட்டக்களப்பு, ஈழம் ) தாயகப் பிரதேசமான வடக்குக் கிழக்கு மாகாணங்களில் உள்ள யாழ்ப்பாணம், மட்டக்களப்பு போதனா வைத்தியசாலைகளில் கொரோனா வைரஸ் தொற்றைத் தடுக்க விசேட செயலணி ஒன்று அமைக்கப்பட்டுள்ளது. இதனடிப்படையில் பிரித்தானியாவில் இருந்து மட்டக்களப்புக்கு வருகை தந்த 61 வயதான நபர் ஒருவருக்குக் கொரேனா வைரஸ் தொற்று இருப்பது உறுதி செய்யப்பட்டுள்ளதால், விசேட சிகிச்சை நிலையம் ஒன்றை மட்டக்களப்பு போதனா வைத்தியசாலை நிர்வாகம் உருவாக்கியுள்ளது. கொரோனா வைரஸ் தடுப்பு விசேட சிகிச்சை நியைலம் எனப் பெயரிடப்பட்டு மட்டக்களப்பு போதனா வைத்தியசாலையில அமைக்கப்பட்டுள்ளது.

(யாழ்ப்பாணம், ஈழம்) கோட்டாபய ராஜபக்ச, மகிந்த ராஜபக்ச ஆகியோரை மையமாகக் கொண்ட இலங்கை அரசாங்கம், சீன அபிவிருத்தி வங்கியுடன் (China Development Bank) (CDB) ஐநூறு மில்லியன் அமெரிக்க டொலர்களை நிதியுதவியாகப் பெறக் கூடிய ஒப்பந்தம் ஒன்றில் கைச்சாத்திட்டுள்ளது. இது தொடர்பாக இலங்கை அரசாங்கம் இன்று புதன்கிழமை அறிக்கை ஒன்றை வெளியிட்டுள்ளது. பத்து ஆண்டுகள் கடன் திட்ட அடிப்படையிலேயே இந்த நிதியுதவி வழங்கப்பட்டுள்ளது. 2018 ஆம் ஆண்டு சீன அபிவிருத்தி வங்கி ஒரு பில்லியன் நிதியை கூட்டுக் கடன் (syndicated loan) திட்ட அடிப்படையில் வழங்கியிருந்தது. ஆனாலும் அ்ந்தக் கடனு்க்கான கால எல்லையும் இந்த ஒப்பந்தத்தின் மூலம் மேலும் எட்டு ஆண்டுகள் நீடிக்கப்பட்டுள்ளன.

(யாழ்ப்பாணம், ஈழம்) இலங்கையில் இன்று செவ்வாய்க்கிழமை இரவு வரை 43 பேருக்கு கொரோனா வைரஸ் தொற்றியுள்ளதாக சுகாதார இலங்கை ஒற்றையாட்சி அரசின் சுகாதார அமைச்சு அறிவித்துள்ளது. 267 பேருக்கு ரத்தப் பரிசோதனைகள் செய்யப்பட்டுள்ளன. இத்தாலி, பிரான்ஸ், தென்கொரிய, ஈரான் மற்றும் ஐரோப்பிய நாடுகளில் இருந்து இலங்கைக்கு வருகை தந்தவர்களினாலேயே கொரோனா வைரஸ் தொற்று ஏற்பட்டுள்ளதாக இலங்கை அரசாங்கத்தின் சுகாதா அமைச்சர் பவித்திரா வன்னியராட்சி கொழும்பில் இடம்பெற்ற செய்தியாளர் சந்திப்பில் கூறியுள்ளார்.

(யாழ்ப்பாணம், ஈழம்) இலங்கை நாடாளுமன்றத் தேர்தலில் ஞானசார தேரர் தலைமையிலான பொதுபல சேன போட்டியிடவுள்ளது. ஜாதிக ஹெல உறுமயவின் முன்னாள் தலைவர் அத்துரலியே ரத்தன தேரர் உள்ளிட்ட பௌத்த குருமார் குழு ஒன்று ஞானசார தேரருடன் இணைந்து தேர்தலில் போட்டியிடவுள்ளது. எங்கள் மக்கள் சக்தி (Ape Jana Bala Pakshaya) என்ற புதிய அரசியல் கட்சியின் மூலம் இவர்கள் தேர்தலில் போட்டியிடவுள்ளனர். கட்சியின் சின்னமாக இலங்கை தேசியக்கொடி அறிவிக்கப்பட்டுள்ளது. ஆனால் தேசியக் கொடியை கட்சியின் சின்னமாகப் பயன்படுத்த முடியாதென்று இலங்கைச் சுயாதீன தேர்தல்கள் ஆணைக்குழுவுக்கு முறைப்பாடுகள் செய்யப்பட்டுள்ளதாகவும் கொழும்பு அரசியல் தகவல்கள் கூறுகின்றன.

(மன்னார், ஈழம் ) கொரோனா வைரஸ் பரவாமல் இருப்பதைத் தடுக்க இலங்கை அரசாங்கம் நடவடிக்கை எடுத்தாலும், சீனாவில் இருந்து இலங்கைக்கு வருகின்ற சீனப் பயணிகளுக்கு கட்டுநாயக்கா சர்வதேச விமான நிலையத்தில் எந்தவொரு பரிசோதனைகளும் இன்றி நேரடியாகக் கொழும்பு நகருக்குள் வருவதற்கு அனுமதியளிக்கப்படுவதாகக் குற்றம் சுமத்தப்பட்டுள்ளது. ஐரோப்பிய நாடுகளில் இருந்து இலங்கைக்கு வரும் பயணிகளைச் சோதனையிட்டுப் பின்னர் பிரத்தியேகமாக அமைக்கப்பட்டுள்ள சிறப்பு முகாம்களில் 14 நாட்கள் தங்க வைக்கப்படுகின்றனர். சீனாவுக்கு அடுத்ததாகக் கொரோனா வைரஸ் தாக்கத்துக்குள்ளான இத்தாலி நாட்டில் இருந்து வரும் பயணிகள், சிறப்பு முகாம்களில் 14 நாட்கள் தடுத்து வைக்கப்படுகின்றனர்.

(முல்லைத்தீவு, ஈழம் ) இலங்கையில் கடந்த சில வாரங்களாக ஏற்பட்டுள்ள கொரோனா வைரஸ் தாக்கம் காரணமாக பாதுகாப்பு ஏற்பாடுகள் முன்னெடுக்கப்பட்டு வரும் நிலையில் தமிழர் தாயகமான வடமாகாணம் கிளிநொச்சி, முல்லைத்தீவு மாவட்டங்களில் இயங்கி வரும் ஆடைத்தொழிற்சாலைகளின் பணிகளை உடனடியாக இடைநிறுத்தமாறு கிளிநொச்சி, முல்லைத்தீவு அரச அதிபர்களிடம் கோரிக்கை முன்வைக்கப்பட்டுள்ளது. 15 ஆயிரத்துக்கும் அதிகமானவர்கள் அங்கு பணியாற்றி வருகின்றனர். இதனால் கொரோனா வைரஸ் தொற்று ஏற்படலாமென்ற அச்சம் ஏற்பட்டுள்ளது.

(வவுனியா, ஈழம்) கலைக்கப்பட்ட நாடாளுமன்றத்தை மீண்டும் உடனடியாகக் கூட்டுமாறு ஐக்கிய மக்கள் சக்தி அரசியல் அணியின் தலைவர் சஜித் பிரேமதாச ஜனாதிபதி கேட்டாபய ராஜபக்சவிடம் கோரிக்கை விடுத்துள்ளார். இலங்கைக்கு வருகை தந்த வெளிநாட்டுப் பயணிகளினால் கொரோனா வைரஸ் பரவுவதையடுத்து பாடசாலைகள், பல்கலைக்கழகங்கள், தனியார் கல்வி உயர் கல்வி நிறுவனங்கள் அனைத்தும் மூடப்பட்டுள்ளன. எனவே பாதுகாப்பு ஏற்பாடுகள், மக்களுக்கு ஏற்படக் கூடிய அசொளகரியங்கள் குறித்துப் பேசவும் உரிய நடவடிக்கைகளைக் கூட்டாக மேற்கொள்ளும் வகையிலும் கலைக்கப்பட்ட நாடாளுமன்றத்தை மீண்டும் கூட்டுமாறு சஜித் பிரேமதாச கோரியுள்ளார்.

(வவுனியா, ஈழம்) கொரோனா வைரஸ் காரணமாக இலங்கையில் உள்ள அனைத்துப் பாடசாலைகளும் மூடப்படும் என்று அறிவித்ததன் பின்னணியில் அரசியல் காரணங்களும் இருப்பதாக இலங்கை ஆசிரியர் சங்கத்தின் பொதுச் செயலாளர் ஜோசப் ஸ்ராலின் கூர்மைச் செய்தித் தளத்திற்குக் கூறியுள்ளார். கொரோனா வைரஸ் பாதிப்பு இருந்தால் பாடசாலைகள் மூடப்பட வேண்டியது அவசியம்தான். ஆனால் சம்பள முரண்பாடுகளைத் தீர்க்குமாறு கோரி எதிர்வரும் 16 ஆம் திகதி முதல் 18 ஆம் திகதி வரை ஆசிரியர்கள், அதிபர்கள் இலங்கை முழுவதிலும் மூன்று நாட்கள் தொடர் போராட்டம் ஒன்றை நடத்தவுள்ள நிலையில் பாடசாலைகள் அனைத்தும் திடீரென நாளை வெள்ளிக்கிழமை முதல் மூடப்பட வேண்டிய காரணம் என்ன என்று அவர் கேள்வி எழுப்பியுள்ளார்.