பளை வைத்தியசாலை வைத்தியர் இலங்கை இராணுவத்தால் கைது- மக்கள் போராட்டம்

வைத்தியர் சின்னையா சிவரூபன் இலங்கை இராணுவத்தினால் பயங்கரவாதத் தடைச் சட்டத்தின் கீழ் கைது செய்யப்பட்டதைக் கண்டித்து கிளிநொச்சி பளைப் பிரதேச வைத்தியசாலைப் பணியாளர்கள், பொதுமக்கள் ஆர்ப்பாட்டத்தில் ஈடுபட்டபோது எடுக்கப்பட்ட படம் இது. குறித்த வைத்தியர் முன்னாள் போராளிகளுக்கும் போரினால் பாதிக்கப்பட்ட மக்களுக்கும் பல்வேறு வகையான உதவிகளை முன் நின்று செய்பவர் என்று மக்கள் கூறுகின்றனர். கைது செய்யப்பட்டமைக்கான காரணம் உறவினர்களுக்குக் கூறப்படவில்லையெனவும் ஆர்ப்பாட்டத்தில் ஈடுபட்ட மக்கள் தெரிவிக்கின்றனர். சிவரூபன் கைது செய்யப்பட்டதால். கிளிநொச்சி உள்ளிட்ட வன்னிப் பிரதேசத்தில் போரினால் பாதிக்கப்பட்ட மக்களுக்கு உதவிபுரிந்து வரும் அதிகாரிகள், பொது நிலையினர் அச்சமடைந்துள்ளதாகப் பிரதேச மக்கள் கூர்மைச் செய்தித் தளத்திடம் தெரிவித்தனர்.

இதன்போது பளை வைத்தியசாலையின் வைத்திய அதிகாரியும் சட்ட வைத்திய அதிகாரியுமான சின்னையா சிவரூபன் கைது செய்யப்பட்டமை தொடர்பாக மக்கள் மத்தியில் அதிருப்தி நிலவுவதாகவும் வைத்தியர் கைது செய்யப்பட்டதால் இன்று மாதாந்த சிகிச்சைக்காக வருகைதந்த நோயாளர்கள் பெரும் அசெளகரியங்களை எதிர்கொள்வதாகவும் கவனயீர்ப்பு போராட்டத்தில் ஈடுபட்டோர் கூர்மை செய்தித்தளத்திற்குத் தெரிவித்தனர்.

சட்ட வைத்தியர் என்ற காரணத்தின் அடிப்படையிலும் போர்க்குற்றங்கள் தொடர்பான தகவல்களை சர்வதேச அரங்கில் மூடி மறைக்கும் நோக்கிலும் வைத்தியர் சிவரூபன் கைது செய்யப்பட்டிருக்கலாமென ஆர்ப்பாட்டத்தில் கலந்துகொண்ட ஒருவர் கூறியுள்ளார்.

வைத்தியர் சிவரூபனை சட்டத்தின் முன் நிறுத்தி விடுதலை செய்வதற்கான ஏற்பாடுகளை மேற்கொள்ள வேண்டும் எனத் தெரிவித்தும் கைதான வைத்தியரின் இடத்துக்கு வேறு வைத்தியர் ஒருவரை தற்காலிகமாக நியமிக்குமாறும் போராட்டத்தில் ஈடுபட்ட மக்கள் வலியுறுத்தினர்.

பளை வைத்தியசாலையின் நோயாளர் நலன்புரிச் சங்கத்தினால் மேற்கொள்ளப்பட்ட இந்த ஆர்ப்பாட்டத்தின் போது கரைச்சி மற்றும் பச்சிலைப்பள்ளி பிரதேச சபைகளின் தவிசாளர்களும் கலந்து கொண்டதாக ஏற்பாட்டாளர்கள் கூர்மைச் செய்தித் தளத்தி்ற்குத் தெரிவித்தனர்.