காணாமல் ஆக்கப்பட்டவர்கள் பற்றிய அலுவலகம் யாழ் நகரில் அதிகாலை திறக்கப்பட்டது

இந்த அலுவலகத்தின் செயற்பாடுகளுக்காக கடந்த 2018 ஆம் ஆண்டுக்கான வருடாந்த செலவாக 1.3 பில்லியன் (1.3 billion INR) நிதி இலங்கை நாடாளுமன்றத்தினால் ஒதுக்கப்பட்டிருந்தது.

போரின்போதும் 2009 ஆம் ஆண்டு மே மாதத்திற்குப் பி;ன்னரான சூழலிலும் வடக்குக்-கிழக்குத் தாயகம் மற்றும் கொழும்பு அதன் புநகர் பகுதிகளில் இலங்கை இராணுவத்தாலும் ஆயுதக் குழுக்களினாலும் தமிழ் இளைஞர் யுவதிகள் பலர் கடத்தப்பட்டுக் காணாமல் ஆக்கப்பட்டுள்ளமை தொடர்பாக ஜெனீவா மனித உரிமைச் சபை உள்ளிட்ட சர்வதேச அரங்கில் பல்வேறு முறைப்பாடுகள், வழக்குகள் பதிவு செய்யப்பட்டுள்ளன. இந்த நிலையில் காணாமல் ஆக்கப்பட்டோர் பற்றிய அலுவலகம் (Office on Missing Persons) (OMP) ஒன்றை இலங்கை அரசாங்கம் கொழும்பில் அமைத்துள்ளது. ஏற்கனவே மகிந்த ராஜபக்ச அரசாங்கத்தில் அமைக்கப்பட்ட இலங்கையின் முன்னாள் நீதியரசர் மஸ்வல் பரணகம தலைமையிலான ஜனாதிபதி ஆணைக்குழுவுக்கு 23 ஆயிரத்தி 586 முறைப்பாடுகள் கிடைத்துள்ளதாக மீள்நல்லிணக்க அமைச்சின் உத்தியோகபூர்வ இணையத் தளத்தில் கூறப்பட்டுள்ளது. எனினும் இலங்கை ஒற்றை ஆட்சி அரசின் நீதி விசாரணைகளில் தமக்கு நம்பிக்கையில்லையென தமிழ்த் தரப்புக் கூறுகின்றது. ஆனாலும் இந்த அலுவலகத்தின் கிளைகளை வடக்குக் கிழக்குத் தாயகப் பிரதேசங்களில் பாதிக்கப்பட்ட மக்களின் எதிர்ப்புகளுக்கு மத்தியிலும் இலங்கை அரசாங்கம் திறந்து வருகின்றது. யாழ்ப்பாணம் ஆடியபாதம் வீதியில் இன்று இந்த அலுவலகம் திறக்கப்பட்டபோது எடுக்கப்பட்ட படம் இது.

இந்த நிலையில் வடக்குக் கிழக்குத் தாயகப் பகுதிகளில் பிராந்திய அலுவலகங்களைத் திறக்க இலங்கை அரசாங்கம் ஏற்பாடு செய்திருந்தது. ஆனால் வலிந்து காணாமல் ஆக்கப்பட்டவர்களின் உறவினர்கள் சங்கம் இந்த அலுவலகத்தில் நம்பிக்கை இல்லையென்றும் இது சர்வதேச சமூகத்தை திருப்திப்படுத்தித் திசை திருப்பும் செயற்பாடு என்றும் குற்றம் சுமத்தியிருந்தது.

இந்த நிலையில் இந்த அலுவலகத்தை இன்று சனிக்கிழமை முற்பகல் 10.30க்கு இலங்கை நாடாளுமன்றச் சபாநாயகர் கரு ஜயசூரிய, அமைச்சர் மனோ கணேசன் ஆகியோரால் திறந்து வைக்கப்படுமென ஏற்கனவே கூறப்பட்டிருந்தது.

ஆனால் இன்று அதிகாலை குறித்த அலுவலகத்தின் நிறைவேற்றுப் பணிப்பாளர் சட்டத்தரணி சாலிய பீரிஸ் அலுவலகத்தை திறந்து வைத்தார். திறப்பு விழாவின்போது மக்கள் எதிர்ப்பு நடவடிக்கையில் ஈடுபடவுள்ளதாகத் தெரிவித்திருந்தனர். இதன் காரணத்தால் அலுவலகம் இன்று அதிகாலை அவசர அவசரமாகத் திறந்து வைக்கப்பட்டிருக்கலாமென காணாமல் ஆக்கப்பட்ட உறவினர் சங்கம் கூறுகின்றது.

இந்த அலுவலகம் காணாமல் ஆக்கப்பட்டவர்கள் பற்றிய விபரங்களையும் உறவினர்களின் வாய்மூல முறைப்பாடுகளையும் மாத்திரமே பதிவு செய்கின்றது. ஆனால் இலங்கை இராணுவ முகாம்களையோ, இரகசிய முகாம்களையோ நேரடியாகச் சென்று பார்வையிட்டு இலங்கைப் படை உயர் அதிகாரிகளையும் விசாரணை செய்யும் அதிகாரம் இந்த அலுவலகத்திற்கு இல்லை.

விசாரணைக்காக சர்வதேச உதவிகள் சர்வதேச நிபுணத்துவம் உள்ளவர்களின் உதவிகள் போன்றவற்றைக் கூட இந்த அலுவலகம் பெற்றுக் கொள்ள முடியாது. கொழும்பை மையப்படுத்தி இலங்கை அரசாங்கத்தின் கட்டுப்பாட்டிலேயே இந்த அலுவலகம் செயற்பட்டு வருகின்றது.

இதனால் இலங்கைப் படையினர் மற்றும் ஆயுதக் குழுக்களினால் காணாமல் ஆக்கப்பட்டவர்களின் உறவினர்கள் இந்த அலுவலகத்திற்குத் தொடர்ந்தும் எதிர்ப்பு வெளியிட்டு வருகின்றனர். வவுனியாவில் தொள்ளாயிரம் நாட்களைத் தாண்டி இவர்கள் போராட்டத்தில் ஈடுபட்டும் வருகின்றனர்.