கேப்பாப்புலவு மக்களுக்குத் தொழிலில்லை- காணிகளைக் கையளிப்பது குறித்து உரையாடல்

முல்லைத்தீவு கேப்பாபுலவு மக்கள் தமது காணிகளைக் கையளிக்குமாறு வலியுறுத்திப் தொடர் போராட்டம் நடத்தி வரும் நிலையில், கிளிநொச்சி மாவட்டச் செயலகத்தில் இடம்பெற்ற கலந்துரையாடலில் தமது அவலங்களைக் கூறியபோது எடுக்கப்பட்ட படம் இது. அதிகாரிகளும் படத்தில் காணப்படுகின்றனர். இலங்கைப் படையினர் அபகரித்து தம்வசப்படுத்தியுள்ள தமது பாரம்பரியக் காணிகள் வளமுள்ள பிரதேசங்கள் என்றும் அந்தக் காணிகளில் இருந்து கிடைக்கும் வருமானங்களைப் படையினரே பெற்றுக் கொள்வதாகவும் மக்கள் எடுத்துக் கூறினர். 2009 ஆம் ஆண்டு மே மாதத்திற்குப் பின்னரான பத்து ஆண்டுகள் வரை தமது தொழில் நடவடிக்கைகளை முன்னெடுக்க முடியாமல் அன்றாட வாழ்வுக்குக் கஷ;டப்படுவதாகவும், மீளக்குடியேறாமல் கொட்டில்களில் தொழில்களும் இல்லாமல் எத்தனை காலத்துக்கு வாழ முடியுமெனவும் இந்தக் கலந்துரையாடலில் பங்குபற்றிய உயர் அதிகாரிகளிடம் மக்கள் கேள்வி எழுப்பினர். இலங்கை இராணுவ அதிகாரிகளும் இதில் பங்குபற்றியிருந்தனர்.

2009 ஆம் ஆண்டு மே மாதத்திற்குப் பின்னரான சூழலில் தொடர்ந்தும் தமது பாரம்பரியக் காணிகளை இலங்கைப் படையினர் தமது பாவனையில் வைத்திருப்பதால், விவசாயச் செய்கைகளில் ஈடுபட முடியாத நிலை ஏற்பட்டுள்ளதாகவும் பிள்ளைகளின் கல்வி நடவடிக்கைகளில் பாதிப்பு ஏற்பட்டுள்ளதாகவும் கலந்துரையாடலில் பங்குபற்றிய உயர் அதிகாரிகள் சுட்டிக்காட்டினர்.

உடனடியாகக் கையளிக்க வேண்டிய காணிகள் தொடர்பாக ஆளுநர் சுரேன் ராகவன, கலந்துரையாடலில் பங்குபற்றிய இலங்கை இராணுவ அதிகாரிகளுக்கு எடுத்து விளக்கினார்.

காணிகளைக் கையளிப்பதற்கு அவர்கள் இணக்கம் தெரிவித்துள்ளனர். ஆனாலும் குறிப்பிட்ட சில காணிகளை இலங்கைத் தேசிய பாதுகாப்புக் கருதி தற்போதைக்குக் கையளிக்க முடியாதெனவும் இராணுவ அதிகாரிகள் கூறியிருக்கின்றனர்.

எவ்வாறாயினும் கலந்துரையாடல் சுமுகமாக நிறைவடைந்துள்ளதாக ஆளுநர் சுரேன் ராகவன் கலந்துரையாடல் நிறைவடைந்த பின்னர் ஊடகவியளார்களிடம் கூறினார். அதேவேளை, காணிகள் கையளிக்கப்படும் வரை தமது போராட்டம் தொடருமென கேப்பாப்புலவு மக்களும் தெரிவித்துள்ளனர்.