கிளிநொச்சியில் பெயர் பலகையுமின்றித் திடீரென அமைக்கப்பட்ட காணாமல் போவோரைக் கண்டறியும் அலுவலகம்

தற்போது கோட்டாபய ராஜபக்ச, மகிந்த ராஜபக்சவை மையமாகக் கொண்ட இலங்கை அரசாங்கத்தைச் சர்வதேச அரங்கில் இருந்து காப்பாற்றவே சுமந்திரன்- பீரிஸ் சந்திப்பு நடந்ததென்றும் அடுத்து வரும் நாட்களில் அமைச்சர் பசில் ராஜபக்சவை சுமந்திரன் சந்திக்கக்கூடுமெனவும் உறவினர்கள் கூறியுள்ளனர்.

மைத்திரி- ரணில் அரசாங்கத்தில் அமைக்கப்பட்ட காணாமல் போவோரைக் கண்டறியும் அலுவலகத்திற்கு வடக்குக் கிழக்கில் உள்ள காணாமல் ஆக்கப்பட்டோர் சங்கங்கள் கடும் எதிர்ப்பு வெளியிட்டிருந்தன.

இந்த அலுவலகத்தில் குறிப்பிட்ட சிலரைத் தவிர வேறெவரும் காணாமல் ஆக்கப்பட்ட தமது பிள்ளைகள், கணவன்மார் பற்றி முறைப்பாடு எதனையும் செய்யவில்லை.

அத்துடன் இந்த அலுவலகம் அவசியமில்லை என்றும் இதனை மூடுவோமெனவும் ராஜபக்ச அரசாங்கம் கூறி வந்தது. இந்தவொரு நிலையில், ஜெனீவாவைத் திருப்திப்படுத்தும் நோக்கில் தமிழ்த்தேசியக் கூட்டமைப்பின் ஆதரவுடன் இந்த அலுவலகம் திறக்கப்பட்டதாக பிரதேச மக்களும் கூறுகின்றனர்.

இலங்கை ஒற்றையாட்சி அரசியல் யாப்புக்கு அமைவான அரசியல் தீர்வுக்கு தமிழரசுக் கட்சியும் அதனை மையப்படுத்திய தமிழ்த் தேசியக் கூட்டமைப்பும் இணங்கியுள்ளமைக்கான முதற் படியா இந்த அலுவலகம் கிளிநொச்சியில் திறந்து வைக்கப்பட்டமைக்கான காரணமென்ற பலமான கேள்விகளும் தாயகப் பிரதேசங்களில் எழுந்துள்ளன.

இதேவேளை, அமெரிக்காவுக்குச் சென்றிருந்த பசில் ராஜபக்ச கடந்த யூன் மாதம் 20 ஆம் திகதி இணையவழி ஊடாக சுமந்திரனுடன் இரகசியமாக உரையாடியிருந்தார் என்பதையும், கொழும்பில் கடந்த ஒன்பதாம் திகதி அமெரிக்கத் தூதுவரின் இல்லத்தில் அவர் முன்னிலையிலேயே அமைச்சர் பீரிஸ் சுமந்திரனைச் சந்தித்திருந்தார் என்பது குறித்தும் கூர்மைச் செய்தித் தளம் செய்திக் கட்டுரையில் அம்பலப்படுத்தியிருந்தது.