(வவுனியா, ஈழம்) மக்களின் தொடர் போராட்டத்தினால் கடந்த யூலை மாதம் 12 ஆம் திகதி பதவி விலகிய ஜனாதிபதி கோட்டாபய ராஜபக்சவை ஸ்ரீலங்கா பொதுஜனப் பெரமுனக் கட்சியில் இருந்து சுதந்திர தேசிய சபையாகச் செயற்படும் அமைப்பின் தலைவர் பேராசிரியர் ஜீ.எல்.பீரிஸ் சந்தித்துப் பேசியுள்ளதாகக் கட்சித் தகவல்கள் கூறுகின்றன. கொழும்பு மல்சேகர மாவத்தையில் உள்ள இலங்கைப் பாதுகாப்புக் கற்கை நெறிகளுக்கான அக்கடமி வளாகத்திற்கு அருகில் உள்ள கோட்டாபய ராஜபக்சவின் இல்லத்தில் சந்திப்பு இடம்பெற்றதாக உள்ளகத் தகவல்கள் கூறுகின்றன.

ரசிய - உக்ரேயன் போர் ஆரம்பிக்கப்பட்ட நாள் முதல் உலக அரசியல் ஒழுங்கில் பல்வேறு மாற்றங்கள் ஏற்பட்டுக்கொண்டிருக்கின்றன. ஆனால் 2009இற்குப் பின்னரான சூழலில், தமிழ்த்தேசிய அரசியலை முன்னெடுத்து வரும் வடக்குக் கிழக்குத் தமிழ்த்தேசியக் கட்சிகள் சர்வதேச அரசியல் பார்வைகள் இன்றி வெறுமனே கட்சி அரசியலில் மாத்திரம் ஈடுபட்டு வருகின்றன. தமிழ்ச் சிவில் சமூக அமைப்புகளுக்கும், சர்வதேச அரசியல் - பொருளாதார அவதானிப்புகள் இருப்பதாகத் தெரியவில்லை.

(வவுனியா, ஈழம்) ஓக்ரோபர் மாதம் இலங்கையில் மீண்டும் பாரியதொரு மக்கள் புரட்சி வெடிக்கும் என முன்னாள் நாடாளுமன்ற உறுப்பினரும் ஐக்கிய மக்கள் சக்தியின் மகளிர் பிரிவு தலைவியுமான ஹிருணிகா பிரேமச்சந்திர எச்சரிக்கை விடுத்துள்ளார். கொழும்பில் செய்தியாளர்களிடம் கருத்து வெளியிட்ட அவர் இவ்வாறு கூறினார். மக்கள் ஒன்றுகூடலை தவிர்ப்பதற்காக வர்த்தமானி அறிவித்தல்கள் பலவற்றை ஜனாதிபதி ரணில் விக்கிரமசிங்க வெளியிட்டுள்ளதாகவும் ஹிருணிகா பிரேமச்சந்திர குற்றம் சுமத்தியுள்ளார்.

(வவுனியா, ஈழம்) ஜப்பான் முன்னாள் பிரதமரின் இறுதிச் சடங்கில் பங்குபற்றி, ஜப்பான் சென்ற ரணில் விக்கிரமசிங்க, இந்தியப் பிரதமர் நரேந்திரமோடியைச் சந்தித்துப் பேசியுள்ளார். புதன்கிழமை இச் சந்திப்பு இடம்பெற்றுள்ளது. சம்பிரதாயபூர்வமாகச் சந்திப்பு இடம்பெற்றாலும். இலங்கைக்குக் கடன் வழங்குவதில் இந்தியாவின் மறுசீரமைப்புத் தொடர்பாக இருவரும் பேசப்பட்டதாகக் கொழும்பில் உள்ள இலங்கை வெளியுறவு அமைச்சு அமைச்சின் தகவல்கள் தெரிவிக்கின்றன. இரண்டு நாள் அதிகாரபூர்வப் பயணத்தை மேற்கொண்டு திங்கட்கிழமை ஜப்பான் சென்ற ஜனாதிபதி ரணில் விக்ரமசிங்க, ஜப்பானின் முன்னாள் பிரதமர் மறைந்த ஷின்சோ அபேயின் இறுதி மரியாதை நிகழ்வில் கலந்துகொண்டார்.

(வவுனியா, ஈழம்) உயர் பாதுகாப்பு வலயம் என்ற போர்வையில் அரசாங்கம் கொழும்பில் இராணுவ முகாம்களை அமைத்துள்ளதாக ஸ்ரீலங்கா பொதுஜன பெரமுனவின் தவிசாளர், முன்னாள் அமைச்சர் பேராசிரியர் ஜீ.எல்.பீரிஸ் தெரிவித்தார். அரச இரகசியங்கள் சட்டத்தின் பிரகாரம் கொழும்பில் பாதுகாப்பு வலையங்கள் அமைக்கப்பட்டு வருவதாகவும் பீரிஸ் கூறினார். கொழும்பில் செவ்வாய்க்கிழமை இடம்பெற்ற செய்தியாளர் சந்திப்பில் கருத்து வெளியிட்ட பேராசிரியர் பீரிஸ், அமைச்சரவை இரகசியங்கள் போன்றவற்றைப் பாதுகாக்கும் இச் சட்டம் 67 வருடங்கள் பழமையானது என்றும் இச் சட்டத்தைப் பயன்படுத்திப் பாதுகாப்பு வலையம் ஒன்றை உருவாக்க முடியாதெனவும் கூறினார்.

(யாழ்ப்பாணம், ஈழம்) காலிமுகத் திடலில் நடைபெற்ற பொருளாதார நெருக்கடிக்கு எதிரான போராட்டங்களில் சிங்கள மக்களுடன் தமிழ் - முஸ்லிம் மக்கள் ஒன்றிணைந்து பங்குபற்றியதன் மூலம் எதிர்காலத்தில் இலங்கைத்தீவில் மாற்றங்கள் ஏற்படுமென ஜெனீவா மனித உரிமைச் சபையின் பூச்சிய வரைபில் (zero draft) நம்பிக்கை வெளியிடப்பட்டுள்ளது. ஆனால் இக் கருத்தின் ஊடாக, ஈழத்தமிழர்களுடைய பிரதான அரசியல் நியாயப்பாடுகள் புறம் தள்ளப்பட்டுள்ளன. ஆணையாளர் மிச்சல் பச்லெட் பதவி விலகியுள்ள சூழலில், இந்த அறிக்கை ஜெனீவா மனித உரிமைச் சபையின் பணியாளர்கள் மட்டத்திலேயே தயாரிக்கப்பட்டுள்ளது. குறித்த அறிக்கையில் தமிழ் - முஸ்லிம் மக்களின் நீண்டகாலப் பிரச்சினை என்று கூறப்படுகின்றதே தவிர தமிழர்களுடைய அரசியல் பிரச்சினையின் ஆழம் அறிக்கையில் தெளிவாக இல்லை.

(வவுனியா, ஈழம்) இலங்கையில் மார்ச் மாதம் ஆரம்பித்த பொருளாதார நெருக்கடியின் பின்னரான நான்கு மாதங்களில் இந்தியா தொள்ளாயிரத்து அறுபத்து எட்டு மில்லியன் டொலர்களைக் கடனாக இலங்கைக்கு வழங்கியுள்ளது. இதன் மூலம் இலங்கையின் மிகப்பெரிய இருதரப்பு கடன் வழங்குனராக இந்தியா மாறியுள்ளதாக டெய்லி பைனான்சியல் டைம்ஸ் கூறுகின்றது. இலங்கையின் மொத்தக் கடனில் அதிகளவு கடன்கள் சீனாவுக்கு உரியது. ஆனாலும் கடந்த நான்கு மாதங்களில் இந்தியா வழங்கிய கடன் தொகையின் அளவு மிகவும் கூடுதலானது என்றும், அதன் கடன் ஊடாகவே பொருளாதார நெருக்கடியை ஓரளவு சமாளிக்க முடிந்ததாகவும் அரசியல் வட்டாரங்கள் கூறுகின்றன.

கொழும்பு மருதானைப் பிரதேசத்தில் அமைக்கப்பட்டுள்ள தாமரைக் கோபுரம், இலங்கைக்கு அதிகளவு கடன் சுமைகளை ஏற்படுத்தியுள்ளதாக எதிர்க்கட்சிகள் குற்றம் சுமத்தி வரும் நிலையில், தாமரைக் கோபுரத்தை நிர்மாணிப்பதற்காக இலங்கை பெற்ற கடனை முழுமையாக செலுத்த வேண்டுமானால், அதன் மூலம் நாளாந்தம் நாற்பத்து ஓராயிரம் அமெரிக்க டொலர் வருமானம் ஈட்டப்பட வேண்டும் என நாடாளுமன்ற உறுப்பினர் பாட்டலி சம்பிக்க ரணவக்க சனிக்கிழமை கொழும்பில் தெரிவித்துள்ளார்.

(மட்டக்களப்பு, ஈழம்) இலங்கைக்குப் பொருத்தமான கடன் வசதிகள் மற்றும் பொருட்கள் நன்கொடை செய்வது உள்ளிட்ட விடயங்கள் குறித்து இந்தியாவுடன் இலங்கை கலந்துரையாடியுள்ளது. இந்தியாவும் இலங்கையும் இணைந்து முன்மொழியப்பட்ட கூட்டு வேலைத் திட்டங்கள் மற்றும் நோக்கங்களை விரைவுபடுத்துவதற்கான வழிமுறைகள் குறித்து பிரதமர் தினேஸ் குணவர்த்தன, கொழும்பில் உள்ள இந்தியத் தூதுவர் கோபால் பாக்லே ஆகியோர் கலந்துரையாடியுள்ளனர். பிரதமரின் அலரி மாளிகையில் வியாழக்கிழமை இடம்பெற்ற சந்திப்பில் பிரதமரின் செயலாளர் அனுர திஸாநாயக்க, இந்திய உயர்ஸ்தானிகராலயத்தின் ஆலோசகர் எல்டோஸ் மேத்யூஸ் ஆகியோர் உள்ளிட்ட அதிகாரிகள் கலந்துகொண்டனர். குறிப்பாக இலங்கைக்கு வழங்கிய கடன் மறுசீரமைப்புக் குறித்தே விவாதிக்கப்பட்டதாகக் கூறப்படுகின்றது.

(வவுனியா, ஈழம்) இலங்கைஅரசாங்கம் தமக்குரிய கடன் மறுசீரமைப்புத் திட்டத்தை, சர்வதேச கடன் வழங்குநர்களின் பிரதிநிதிகளுடன் இடம்பெறும் மேலதிகமான கலந்துரரையாடல்களின்போது அதிகாரபூர்வமாக அறிவிக்கும் என மத்திய வங்கி ஆளுநர் கலாநிதி நந்தலால் வீரசிங்க தெரிவித்துள்ளார். சர்வதேச நிதி ஆலோசகர்களான க்லிபோர்ட் சான்ஸ் (Clifford Chance) மற்றும் லசார்ட் (Lazard) ஆகியோரின் உதவியுடன் இலங்கை கடன் மறுசீரமைப்பு வேலை திட்டத்தை முன்னெடுத்துள்ளதாகவும் நந்தலால் வீரசிங்க கொழும்பில் வியாழக்கிழமை இடம்பெற்ற செய்தியாளர் சந்திப்பில் தெரிவித்தார்.