(முல்லைத்தீவு) எதிர்வரும் 21ஆம் திகதி முதல் 27ஆம் திகதி வரை மாவீரர் வாரமாக அனுஷ்டிக்கப்படவுள்ள நிலையில், கார்த்திகை மாதம் 27 ஆம் திகதி (நவம்பர் மாதம்) துயிலுமில்லங்களில் தமது உறவுகளுக்கு அஞ்சலி செலுத்தவுள்ளனர். 2009 ஆம் ஆண்டுக்குப் பின்னரான சூழலில் ஒவ்வொரு ஆண்டும் இந்த நிகழ்வு இலங்கை இராணுவத்தின் பல தடைகளுக்கு மத்தியில் இடம்பெற்று வருகின்றது. ஆனால் கடந்த வருடம் முதல் நீதிமன்றங்களில் தடை உத்தரவைப் பெற்று இந்த அரசாங்கம் மாவீரர் நாள் நினைவேந்தல் நிகழ்வுகளுக்குத் தடைவிதித்து வருகின்றது.

(மட்டக்களப்பு, ஈழம்) கொழும்பில் இன்று செவ்வாய்க்கிழமை சஜித் பிரேமதாச தலைமையிலான ஐக்கிய மக்கள் சக்தி அணியினரால் நடத்தப்பட்ட ஆர்ப்பாட்டப் பேரணி வெற்றி பெறவில்லை. வெளி மாவட்டங்களில் இரு பேரணியாக வாகனங்களில் ஆதரவாளர்கள் கொழும்பு நகரை நோக்கி வந்தனர். எதிர்பார்க்கப்பட்ட மோதல்கள் எதுவும் இடம்பெறவில்லை. வன்முறைகள் எதுவும் இன்றி ஆர்ப்பாட்டப் பேரணி நடைபெற்றது. இந்த ஆர்ப்பாட்டத்திற்கு ரணில் விக்கிரமசிங்க தலைமையிலான ஐக்கிய தேசியக் கட்சி மற்றும் ஜே.வி.பி போன்ற சிறிய எதிர்க்கட்சிகள் எதுவும் ஒத்துழைப்பு வழங்கவில்லை.

(மன்னார், ஈழம்) வட மாகாணத்தின் மன்னார் மாவட்டத்தில் கொவிட்-19 நோய்த் தொற்று தற்போது மீண்டும் வேகமாக பரவி வருகிறது. இந்த நிலையில் மன்னார் மாவட்டத்தில் வசிப்பவர்களில் இரண்டு தடுப்பூசிகளைப் பெற்றுக் கொண்டவர்கள் மட்டுமே பொது வெளியில் நடமாடுவதற்கும் வியாபாரம், அலுவலக பணிகள், பொதுப் போக்குவரத்துச் சேவைகள் மற்றும் ஏனைய தொழில் முயற்சிகளில் ஈடுபடுவதற்கு நேற்றுத் திங்கட்கிழமை தொடக்கம் அனுமதிக்கப்பட்டுள்ளதாக மன்னார் சுகாதார சேவைகள் பணிப்பாளர் டொக்டர் தர்மராஜன் வினோதன் ஊடகங்களுக்குத் தெரிவித்தார்.

(வவுனியா, ஈழம்) சஜித் பிரேமதாச தலைமையிலான ஐக்கிய மக்கள் சக்தி நாளை செவ்வாய்க்கிழமை பாரிய எதிர்ப்புப் போராட்டம் ஒன்றை கொழும்பில் நடத்தத் திட்டமிட்டிருந்த நிலையில், நாளை 16 ஆம் திகதி செவ்வாய்க்கிழமை முதல் பொது ஒன்றுகூடல் மற்றும் கூட்டங்கள் பொது நிகழ்வுகளுக்கு அரசாங்கம் தடை விதித்துள்ளது. கொவிட் 19 நோய்ப்பரவலைக் கட்டுப்படுத்தும் புதிய சுகாதார விதிமுறை இன்று திங்கட்கிழமை மாலை அவசர அவசரமாக வெளியிடப்பட்டுள்ளது. புதிய விதிமுறையிலேயே சுகாதார சேவைகள் பணிப்பாளர் நாயகம், விசேட மருத்துவர் அசேல குணவர்தன தடைவிதித்துள்ளதாக அறிவித்துள்ளார்.

(வவுனியா, ஈழம்) கொழும்பு பேராயர் இல்லத்தின் உயிர்த்த ஞாயிறுத் தாக்குதல் குறித்த விசாரணைகைள அவதானிக்கும் குழுவின் தலைவர் அருட்தந்தை சிறில் காமினி நாளை குற்றப் புலனாய்வுத் திணைக்களத்துக்கு விசாரணைக்கு அழைக்கப்பட்டுள்ளார். இலங்கை ஒற்றையாட்சி அரசின் உயர் நீதிமன்றில் சென்ற 8 ஆம் திகதி பெறப்பட்ட வாக்கு மூலத்தின் அடிப்படையில் குற்றப் புலனாய்வுப் பிரிவினர் அருட்தந்தை சிறில் காமினியை அழைத்துள்ளனர். உயிர்த்த ஞாயிறு தாக்குதல் தொடர்பாக, வெளிநாடுகளில் வாழும் மக்களுக்கு விளக்கமளிக்கும் இணையவழிச் செய்தியாளர் மாநாடு கடந்த மாதம் 23 ஆம் திகதி பேராயர் தலைமையில் நடைபெற்றிருந்தது.

மகிந்த ராஜபக்ச தலைமையிலான ஸ்ரீலங்கா பொதுஜனப் பெரமுனக் கட்சிக்குள் முரண்பாடுகள் அதிகரித்துள்ள நிலையில், அதன் பங்காளிக் கட்சியான லங்கா சமசமாஜக் கட்சி வெளியேறத் தீர்மானத்துள்ளதாகக் கட்சித் தகவல்கள் கூறுகின்றன. பிரதான பங்காளிக்; கட்சியான சிறிலங்கா பொதுஜன பெரமுனவின் அமைச்சர்கள், நாடாளுமன்ற உறுப்பினர்களால் திட்டமிட்டு மேற்கொள்ளப்படும் அச்சுறுத்தல்கள் மற்றும் மக்கள் விரோத செயல்கள் குறித்து கலந்துரையாட வேண்டுமெனப் பிரதமர் மகிந்த ராஜபக்சவிடம் கோரியதாகவும் ஆனாலும் இதுவரை அதற்கு உரிய பதில் கிடைக்கவில்லை எனவும் சமசமாஜக் கட்சியின் தலைவர் பேராசிரியர் திஸ்ஸ விதாரண தெரிவத்தார்.

(வவுனியா, ஈழம்) கொழும்பு பல்கலைக்கழகத்தின் வேந்தர் பதவியை வகிக்கும் தகுதி தனக்கு இல்லை என நாரஹேன்பிட்டி அபயராம விகாராதிபதி முருத்தெட்டுவே ஆனந்த தேரர் தெரிவித்துள்ளார். சென்ற வாரம் கொழும்பு பல்கலைக்கழகத்தின் வேந்தராக ஜனாதிபதி கோட்டாபய ராஜபக்சவினால் நியமிக்கப்பட்டமை குறித்து கேட்கப்பட்ட கேள்வி ஒன்றுக்கு பதிலளிக்கும்போதே தேரர் இவ்வாறு தெரிவித்தார். அரச தொலைக்காட்சியான ஐ.ரி.என் தொலைக்காட்சிக்கு இன்று வியாழக்கிழமை முருத்தெட்டுவே ஆனந்த தேரர் நேர்காணல் ஒன்றை வழங்கியிருந்தார்.

(வவுனியா, ஈழம்) சிங்களம் அல்லாத ஏனைய சமூகங்கள் மீது தாக்குதல் நடத்தவா ஒரே நாடு ஒரே சட்டம் என்ற ஜனாதிபதி செயலணி நியமிக்கப்பட்டதென ஜே.வி.பியின் தலைவர் அனுரகுமார திஸாநாயக்கா நாடாளுமன்றத்தில் தெரிவித்துள்ளார். இன்று புதன்கிழமை இடம்பெற்ற அமர்வின் ஆரம்பத்தில் இடம்பெற்ற உறுப்பினர்களுக்கான கேள்வி நேரத்தின்போதே அவர் இவ்வாறு கூறினார். 20 ஆவது திருத்தச் சட்டத்தைக் கொண்டு வந்து ஜனாதிபதியின் அதிகாரத்தை மேலும் உறுதிப்படுத்தியதால் இன்று இலங்கைத்தீவு பாரிய பிரச்சினைகளுக்கு முகம் கொடுத்துள்ளதாகக் கூறிய அனுரகுமார திஸாநாயக்கா, ஒரே நாடு ஒரே சட்டம் செயலணியின் தலைவர் ஞானசார தேரரின் தகுதி தொடர்பாகக் கேள்வி தொடுத்தார்.

(மன்னார், ஈழம்) இலங்கையின் வட மத்திய மாகாணம் அனுராதபுரம் மாவட்டத்தில் உள்ள மல்வத்த ஓயா ஆறு (அருவி ஆறு ) பெருக்கெடுத் துள்ளதால் வட மாகாணத்தின் மன்னார் மாவட்டத்தில் உள்ள மடு நானாட்டான் மற்றும் முசலி ஆகிய பிரதேச செயலகப் பிரிவில் உள்ள பல கிராமங்கள் நீரில் மூழ்கும் அபாய நிலை ஏற்பட்டுள்ளது. இந்நிலையில் இப்பகுதியில் வசிக்கும் மக்களை மிகுந்த அவதானத்துடன் இருக்கச் செய்யும் வகையில் மன்னார் அரசாங்க அதிபர் திருமதி ஏ. ஸ்ரன்லி டி மேல் இப்பகுதி மக்களுக்கு சிவப்பு எச்சரிக்கை (RED ALERT) எனும் அபாய அறிவிப்பை விடுத்துள்ளார்.

(மன்னார், ஈழம்) இலங்கைத்தீவில் கடந்த தினங்களாகப் பெய்துவரும் கடும் அடை மழையினால் வெள்ளம், மின்னல், காற்றுடன் கூடிய காற்றினால் இதுவரை 15 பேர் உயிரிழந்துள்ளதாக அரசாங்கத் தகவல் திணைக்களம் தெரிவித்துள்ளது. தமிழர் தாயகப் பகுதியான மன்னார் மாவட்டத்தின் பல பகுதிகள் நீரில் முற்றாக முழ்கியுள்ளதுடன் பல்லாயிரக்கணக்கான குடும்பங்கள் கடும் பாதிப்பு அடைந்துள்ளதாக அதிகாரிகள் தெரிவிக்கின்றனர். மன்னார் மாவட்டத்தில் கடந்த இரண்டு நாட்களாகப் பெய்துவரும் தொடர் அடைமழை காரணமாக இயல்பு வாழ்க்கை முற்றாகப் பாதிப்படைந்துள்ளது. அத்துடன் பல வீதிகளும் நெற் செய்கை மேற்கொள்ளப்பட்ட வயல் நிலங்களும் நீரில் மூழ்கியுள்ளது.