(முல்லைத்தீவு, ஈழம்) இலங்கை ஜனாதிபதி மைத்திரிபால சிறிசேன நாடாளுமன்றத்தை கலைத்தமைக்கு எதிரான வர்த்தமானி அறிவித்தலை இரத்துச் செய்யுமாறு கோரும் மனு மீதான விசாரணை ஏழுபேர் கொண்ட நீதியரசர்கள் முன்னிலையில் இன்று வெள்ளிக்கிழமை நான்காவது நாளாகவும் இடம்பெற்றது. ஆனால் இறுதித் தீர்ப்பு தற்போதைக்கு வெளிவராது என உயர் நீதிமன்றத் தகவல்கள் கூறுகின்றன. இன்று ஏழாம் திகதி இறுதித் தீர்ப்பு வழங்கப்படும் என கடந்த 13 ஆம் திகதி உயர் நீதிமன்ற நீதியரசர்கள் கூறியிருந்தனர். ஆனால் நேற்று வியாழக்கிழமை இடம்பெற்ற விசாரணையின் போது நாளை சனிக்கிழமை வரை நீடிக்கப்பட்டிருந்தது. ஆனாலும் எதிர்வரும் திங்கட்கிழமை வரை ஒத்திவைக்கப்பட்டுள்ளதாக அரசதரப்பு சட்டத்தரணிகள் தெரிவித்துள்ளனர்.

(கிளிநொச்சி, ஈழம்) நாட்டில் தற்போது மழைகாலம் ஆரம்பித்துள்ள நிலையில் விவசாயத்தை அடிப்படை வாழ்வாதாரமாகக் கொண்டுள்ள கிளிநொச்சி மாவட்டத்தில் கடந்த சில நாட்களாக பெய்த கடும் மழையினால் 34 ஹெக்டேயர் நெற்செய்கை அழிவடைந்துள்ளதாக பிரதி மாகாண விவசாயப் பணிப்பாளர் பி.அற்புதச்சந்திரன் தெரிவித்துள்ளார். இலங்கையில் கடந்த வாரம் நிலவிய மழைக் காலநிலையால் பல்வேறு பகுதிகளிலும் விவசாயம் உட்பட பயிர்ச்செய்கை நடவடிக்கை பாதிக்கப்பட்டுள்ளதாக அவர் கூர்மை செய்தித் தளத்திற்கு சுட்டிக்காட்டினார்.

(மட்டக்களப்பு, ஈழம்) இலங்கையில் ஏற்பட்டுள்ள அரசியல் நெருக்கடியினால் அடுத்த ஆண்டு ஜனவரி மாதம் முதல் பாரிய பொருளாதார நெருக்கடி ஏற்படவுள்ளதாக ஐக்கிய தேசியக் கட்சியின் கொழும்பு மாவட்ட நாடாளுமன்ற உறுப்பினர் ரவி கருணாநாயக்க கூறியுள்ளார். அமைச்சரவை செயற்படாமையினால் அரச திணைக்களங்கள், கூட்டுத்தாபனங்கள் இயங்க முடியாத நிலை ஏற்பட்டுள்ளது. இதனால் மக்களின் அன்றாடத் தேவைகளுக்கான நிதி நடைமுறைகள், சேவைகள் அனைத்தும் படிப்படியாக செயலிழந்து வருவதாகவும் அவர் கூறியுள்ளார். அதேவேளை, இலங்கை மத்திய வங்கியின் செயற்பாடுகள் பாதிக்கப்படவுள்ளதாகக் கூறியுள்ள கட்சியின் நாடாளுமன்ற உறுப்பினரும் பொருளாதார நிபுணருமான ஹர்ஷ டி சில்வா, மக்களின் இயல்பு வாழ்க்கையிலும் பாதிப்பு ஏற்படும் எனக் கூறியுள்ளார்.

நாடாளுமன்றத்தை கலைத்தமை தொடர்பாக ஜனாதிபதி மைத்திரிபால சிறிசேன கையொப்பமிட்ட வர்த்தமானி அறிவித்தலுக்கு எதிரான உயர் நீதிமன்றத்தின் இடைக்காலத் தடை எதிர்வரும் எட்டாம் திகதி சனிக்கிழமை வரை நீடிக்கப்பட்டுள்ளது. நாடாளுமன்றத்தைக் கலைப்பது தொடர்பான வர்த்தமானி அறிவித்தல் இலங்கை அரசியல் யாப்புக்கு முரணானது என்றும் அதனை இரத்துச் செய்யுமாறு கோரியும் உயர்நீதிமன்றத்தில் ஐக்கிய தேசியக் கட்சி, தமிழ்த்தேசியக் கூட்டமைப்பு. ஜே.வி.பி ஆகிய கட்சிகள் மற்றும் பொது அமைப்புகள் தாக்கல் செய்துள்ள மனுக்கள் மீ;தான விசாரணை கடந்த மூன்று நாட்களாக உயர் நீதிமன்றத்தில் நடைபெற்று வருகின்றது. நாளை வெள்ளிக்கிழமை இறுதித் தீர்;ப்பு வழங்கப்படும் என உயர் நீதிமன்ற நீதியரசர்கள் முன்னர் கூறியிருந்தனர்.

(மன்னார், ஈழம்) தனது கொலைச் சதி முயற்சி தொடர்பில் நாமல் குமாரவின் குரல்வழிப்பதிவு வெளிவந்த பின்னரும் தமக்கிருந்த பாதுகாப்பு வெகுவாக குறைக்கப்பட்டுள்ளதாகவும், உயிருக்கு ஆபத்து ஏற்படும் பட்சத்தில் பாதுகாப்பு அமைச்சு மற்றும் பொலிஸ் திணைக்களத்திற்கு பொறுப்பானவர் என்ற வகையில் இலங்கை ஜனாதிபதி மைத்திரிபால சிறிசேனவே அதற்கு பொறுப்பேற்க வேண்டும் என்று அகில இலங்கை மக்கள் காங்கிரஸ் தலைவர் ரிஷாட் பதியுதீன் தெரிவித்தார். இலங்கை குற்றப்புலனாய்வுத் திணைக்களத்தின் அழைப்பிற்கிணங்க இன்று காலை அங்கு சென்ற அவர் சுமார் 3 மணி நேரம் கொலைச்சதி முயற்சி தொடர்பில் வாக்குமூலம் வழங்கிய பின்னர் ஊடகவியலாளர்களிடம் கருத்துத் தெரிவித்தார்.

(வவுனியா, ஈழம் ) இலங்கையின் பொருளாதாரத்தி்ல் பிரதான பங்களிப்புச் செய்யும் பெருந்தோட்டத்துறை தொழிலாளர்கள் ஆயிரம் ரூபா சம்பள உயர்வு வழங்குமாறு கோரி இன்று வியாழக்கிழமை கவனயீர்ப்புப் போட்டம் ஒன்றில் ஈடுபட்டனர். ஏன் ஆயிரம் ரூபாவை வழங்க முடியாது என கேள்வி எழுப்பியுள்ள கொட்டகலை பெருந்தோட்ட கம்பனியின் கீழ் இயங்கும் கொட்டகலை ஸ்டோனிகிளிப் தோட்ட தொழிலாளர்கள் முதலாளிமார் சம்மேளனத்தின் செயற்பாடுகளைக் கண்டித்து போராட்டத்தில் ஈடுபட்டனர். ஆயிரத்துக்கும் அதிகமான தொழிலாளர்கள் இந்தப் போராட்டத்தில் கலந்து கொண்டனர்.

இலங்கை நாடாளுமன்றம் கலைக்கப்பட்டமைக்கு எதிராக கொழும்பு உயர் நீதிமன்றத்தில் வழக்கு நடைபெறுவதாலும், மகிந்த ராஜபக்ச பிரதமராக செயற்பட முடியாது எனவும் அமைச்சரவையும் இயங்க முடியாதெனவும் இடைக்கால தடை விதிக்கப்பட்டு மேலதிக விசாரணைகள் கொழும்பு மேன்முறையீட்டு நீதிமன்றத்தில் நடைபெற்றுக் கொண்டிருப்பதாலும் நாடாளுமன்ற அமர்வை நடத்த முடியாதென மகிந்த ராஜபக்ச தரப்பு சபாநாயகர் கரு ஜயசூரியவுக்கு அறிவித்துள்ளது. ஸ்ரீலங்கா சுத்திரக் கட்சியை மையப்படுத்திய ஐக்கிய மக்கள் சுதந்திரக் கூட்டமைப்பு புதன்கிழமை கூடி ஆராய்ந்த பின்னர் சபாநாயகருக்கு கடிதம் அனுப்பியுள்ளது. நீதிமன்ற வழக்குகள் இருப்பதால் நாடாளுமன்ற அமர்வை நடத்துவது சட்டத்திற்கு முரணானது எனவும் கடிதத்தில் கூறப்பட்டுள்ளது.

(முல்லைத்தீவு, ஈழம்) ஈழத்தமிழ் மக்கள் அநியாயமாக கொத்துக் கொத்தாக கொன்றொழிக்கப்பட்டதற்கும் ஆயிரக்கணக்கில் காணாமல் ஆக்கப்பட்டதற்கும் காரணமாக இருந்த இலங்கையின் அப்போதைய ஜனாதிபதி மகிந்த ராஜபக்ச மீண்டும் பிரதமராக பதவி வகித்தால் தமது போராட்டத்தைத் தொடர்ந்து முன்னெடுக்க முடியாது என்பதுடன் தமது உயிருக்கும் அச்சுறுத்தல் என்று கடந்த 1 வருடத்துக்கும் மேலாக தொடர் போராட்டத்தில் ஈடுபட்டுவரும் வலிந்து காணாமல் ஆக்கப்பட்டோரின் உறவினர்கள் ஐ.நா பிரதிநிதிகளிடம் சுட்டிக்காட்டியுள்ளனர்.

(கிளிநொச்சி, ஈழம்) இலங்கை ஜனாதிபதி மைத்திரிபால சிறிசேன நாடாளுமன்றத்தை கலைத்தமைக்கு எதிரான வர்த்தமானி அறிவித்தலை ரத்துச் செய்யுமாறு கோரும் மனு மீதான விசாரணை ஏழுபேர் கொண்ட நீதியரசர்கள் முன்னிலையில் இன்று புதன்கிழமை இரண்டாவது நாளாகவும் விசாரணைக்கு எடுத்துக்கொள்ளப்பட்டுள்ளது. இலங்கை உயர் நீதிமன்ற பிரதம நீதியரசர் நளின் பெரேர மற்றும் பிரியந்த ஜெயவர்த்தன, பிரசன்ன ஜயவர்தன, சிசிர டி ஆப்ரு, விஜித் மாலல்கொட, புவனேக அலுவிஹாரே மற்றும் முர்து பெர்னாண்டோ ஆகிய ஏழு நீதியரசர்கள் விசாரணையில் ஈடுபட்டுள்ளனர். நாடாளுமன்றத்தை நான்கரை வருடங்களுக்கு முன்னதாக கலைப்பதற்கான அதிகாரம் அரசியல் அமைப்பில் ஜனாதிபதி்க்கு இல்லை என்று மனுதாரர்கள் சார்பில் முன்லையான சட்டத்தரணிகள் கூறியுள்ளனர்.

(வவுனியா, ஈழம் ) வவுனியா மாவட்டத்தில் உள்ள வேப்பங்குளம் ஏழாம் ஒழுங்கைக்கு அருகில் நேற்று செவ்வாய்க்கிழமை இரவு வாள்வெட்டுக் குழுவொன்று அட்டகாசத்தில் ஈடுபட்டுள்ளது. இதனால் வர்த்தகர்கள் வர்த்தக நிலையங்களை அவசர அவசரமாக மூடிவிட்டு தப்பிச் சென்றுள்ளனர். இரவு 8.30 முதல் சுமார் ஒரு மணி நேரம் வரை அட்டகாசத்தில் ஈடுபட்டதுடன் பொதுமக்களையும் அச்சுறுத்தியுள்ளனர். இலங்கைப் பொலிஸாருக்கு உடனடியாக அறிவித்த போதும் தாமதித்தே பொலிஸார் சம்பவ இடத்திற்கு வருகை தந்ததாக பாதிக்கப்பட்ட வர்த்தகர்கள் தெரிவித்தனர். வேப்பங்குளம் ஏழாம் ஒழுங்கைக்கு அருகில் உள்ள வேப்பங்குளம் சிறுவர் இல்லத்திற்கு முன்பாகவே வாள்வெட்டுக்குழு அட்டகாசத்தில் ஈடுபட்டுள்ளது.